Þrír íslenskir keppendur tóku þátt á heimsmeistaramóti öldunga í ólympískum lyftingum (WMC) sem fór fram í Aþenu í Grikklandi í september. Uppskeran var frábær, einn heimsmeistaratitill, eitt silfur og fjöldi meta.

Anna Guðrún heimsmeistari í annað sinn

Anna Guðrún Halldórsdóttir varð heimsmeistari í -86 kg flokki kvenna 55–59 ára (W55). Hún lyfti samtals 135 kg, 55 kg í snörun og 80 kg í jafnhendingu.

Í snörun opnaði Anna Guðrún á 53 kg. Hún missti 55 kg í annarri tilraun en kláraði þá þyngd í þeirri þriðju. Í jafnhendingu tryggði hún sér titilinn strax í fyrstu lyftu með 73 kg og bætti svo við 76 kg. Í síðustu lyftu reyndi hún við 80 kg, sem er nýtt Evrópumet og 1 kg betra en fyrra met hennar, 79 kg. Lyftan var gild á þremur hvítum ljósum. Hún setti einnig met í jafnhendingu í flokkum 50 og 55 ára.

Anna Guðrún kom inn í mótið sem sigurstranglegust. Hún varð heimsmeistari árið 2024 og er ríkjandi Evrópumeistari í sínum flokki. Þrátt fyrir nokkuð stuttan keppnisferil á hún nú tvo heimsmeistaratitla, eitt silfur á HM, þrjá Evrópumeistaratitla og sex Evrópumet í tveimur þyngdarflokkum.

Silfur og metaregn hjá Hrund

Hrund Scheving keppti í -77 kg flokki kvenna 45–49 ára (W45) og náði sér í silfur. Hún átti sex gildar lyftur: 65, 69 og 71 kg í snörun og 85, 88 og 90 kg í jafnhendingu, eða 161 kg samtals. Með 71 kg snörun, 90 kg jafnhendingu og 161 kg samanlagt setti hún met í flokkum 35, 40 og 45 ára.

Steinunn í keppni í flokki 60 ára

Steinunn Sveinsdóttir keppti í -86 kg flokki kvenna 60–64 ára (W60). Hún lyfti 29 kg í fyrstu tilraun í snörun en næstu tvær tilraunir voru ekki gildar. Hún náði því miður ekki gildri lyftu í jafnhendingu og fékk því ekki skráðan samanlagðan árangur.

Lyftingasamband Íslands óskar keppendum innilega til hamingju með árangurinn!

Öll úrslit má sjá á results.lsi.is.

Heimildir:

• Úrslit – HM öldunga (WMC) 2026
• Sunnlenska – Anna Guðrún bætti öðrum heimsmeistaratitli í safnið

Heimsmeistaramót öldunga fer fram í Aþenu dagana 17. – 26. september.

Við eigum þrjá keppendur á mótinu, allt konur.

Steinunn Sveinsdóttir keppir laugardaginn 19. september kl. 12:15 á staðartíma í W60 86 kg flokki

Anna Guðrún Halldórsdóttir keppir sunnudaginn 20. september kl. 11:45 á staðartíma í W55 í 86 kg flokki

Hrund Scheving keppir þriðjudaginn 22. september kl. 15:15 í W45 í 77 kg flokki

Mótið er í beinu streymi á YouTube

LSÍ mun eftir bestu getur flytja fréttir frá mótinu. Fylgist með á lsi.is og miðlum (Instagram og Facebook).

Það er mikið gleðiefni að sjá 33 skráða keppendur frá átta félögum á Frumherjamótið, haustmót LSÍ og Heimsklassa sem fer fram í WorldFit salnum í Kringlunni laugardaginn 19. september.

Mikið hefur verið lagt í umgjörð mótsins en þar má meðal annars nefna:

• Allir keppendur fá gjafabréf frá Frumherja
• Áhorfendur fá afsláttarmiða í skoðun hjá Frumherja
• Frumherjaverðlaunin verða veitt í fyrsta sinn
• UPP og Gatorade styðja við endurheimt efstu þriggja keppenda í karla- og kvennaflokki

Verðlaunaafhending fer fram í loks móts um kl. 15:30

Keppendalisti – Konur

• Vigtun frá kl. 07:00
• Keppni hefst í B flokki kl. 09:00 og í A flokki kl. 11:10

Keppendalisti – Karlar

• Vigtun frá kl. 08:00
• Keppni hefst kl. 13:10

Fjöldi keppenda frá félögum

Lyftingasamband Íslands og KILROY hafa undirritað samstarfssamning til næstu tveggja ára þar sem KILROY verður ferðasamstarfsaðili sambandsins og annast ferðabókanir í tengslum við landsliðs- og æfingaferðir LSÍ.

Markmið samstarfsins er að byggja upp traust og farsælt langtímasamband þar sem KILROY getur nýtt sér þekkingu á ferðamynstri og þörfum LSÍ til að veita sambandinu markvissa og persónulega þjónustu. Samstarfið mun jafnframt skapa aukið utanumhald um ferðir sambandsins og stuðla að hagkvæmum og öruggum ferðalausnum fyrir LSÍ og landsliðsfólk þess.

Við hjá LSÍ erum mjög ánægð með þetta nýja samstarf við KILROY. Ferðir eru stór og mikilvægur hluti af starfsemi sambandsins og því skiptir miklu máli að hafa traustan samstarfsaðila sem getur veitt okkur góða ráðgjöf og þjónustu. Við hlökkum til að byggja upp samstarfið á komandi árum, segir Arnór Ásgeirsson, framkvæmdastjóri LSÍ.

Samstarf KILROY og LSÍ mun þó ekki eingöngu snúa að ferðatengdri þjónustu. Aðilar hyggjast einnig kanna frekara markaðs- og sýnileikasamstarf samhliða ferðasamstarfinu. Það getur meðal annars falið í sýnileika KILROY í tengslum við ferðir og starfsemi LSÍ, merkingum á fatnaði eða búnaði, samfélagsmiðlum, viðburðum og öðrum verkefnum sem skapa gagnkvæmt virði.

Við hjá KILROY hlökkum til að taka utan um ferðamál LSÍ og nýta okkar reynslu til að gera ferðirnar eins einfaldar og hagkvæmar og hægt er. Okkar markmið er ekki bara að bóka ferðir, heldur að kynnast starfsemi sambandsins, ferðamynstrinu og þörfum landsliðsfólksins þannig að við getum veitt sem besta þjónustu og ráðgjöf hverju sinni. Með því getum við einfaldað utanumhald, fundið hagkvæmar lausnir og tryggt að afreksfólkið sem fer út fyrir Íslands hönd geti einbeitt sér að sínu verkefni, segir Sæmundur Hrafn Linduson, rekstrarstjóri KILROY.

Undirritun samningsins fór fram í höfuðstöðvum KILROY í viðurvist Arnórs Ásgeirssonar, framkvæmdastjóra LSÍ og Sæmundar Hrafns Lindusonar, rekstrarstjóra KILROY. Með þeim á myndinni er landsliðsfólk LSÍ, þau Þórbergur Ernir Hlynsson, Eygló Fanndal Sturludóttir og Emilía Nótt Davíðsdóttir.

Ferðin þín byrjar hér – og næstu tvö árin byrjar ferðin okkar hjá KILROY.

LSÍ og Frumherji taka höndum saman og kynna haustmót LSÍ.

Mótið fer fram laugardaginn 19. september í WorldFit salnum í Kringlunni í umsjá lyftingafélagsins Heimsklassa. Skráning fer fram á Abler.

Áætlað er að hefja vigtun kl. 07:00 og mótið sjálft kl. 09:00.

Sem einn af aðalsamstarfsaðilum LSÍ mun Frumherji sjá til þess að umgjörðin verður sem glæsilegust en þar má nefna;

• Allir keppendur fá gjafabréf í skoðun
• Áhorfendur fá 15% afsláttarmiða
• Frumherji mótsins verður valinn, en þann heiður hlýtur sá keppandi sem að mati dómnefndar á bestu tilþrif mótsins, óvænta innkomu eða sýnir með einum eða öðrum hætti yfirburða íþróttamennsku

Skráning á mótið er opin til og með sunnudagsins 13. september