Þórbergur Ernir Hlynsson keppti í dag í 110 kg flokki karla á heimsmeistaramótinu í ólympískum lyftingum í Ningbo í Kína. Þetta var fyrsta heimsmeistaramót Þórbergs í fullorðinsflokki, en hann keppti í C-riðli þar sem hann reyndi við 144 kg í snörun og 172 kg í jafnhendingu.
Keppnin reyndist Þórbergi erfið í snörun. Hann gerði þrjár tilraunir við 144 kg en náði því miður ekki að ljúka neinni þeirra með gildri lyftu.
Í jafnhendingu sýndi Þórbergur hins vegar góð tilþrif. Hann opnaði keppnina af öryggi með 172 kg lyftu sem fór vel upp. Í annarri tilraun hækkaði hann í 181 kg, sem hefði verið nýtt Íslandsmet í jafnhendingu í 110 kg flokki, en sú lyfta tókst ekki þrátt fyrir öflugt tog. Í þriðju og síðustu tilraun reyndi hann við 182 kg en náði ekki að ljúka lyftunni.
Þórbergur lauk því keppni án gilds árangurs í samanlögðu. Þrátt fyrir að niðurstaðan hafi ekki orðið sú sem stefnt var að er þátttakan á heimsmeistaramóti fullorðinna mikilvægur áfangi á ferli hans. Þórbergur hefur á undanförnum árum náð góðum árangri í yngri aldursflokkum og á alþjóðlegum vettvangi, meðal annars með sjötta sæti á Evrópumeistaramóti U20 og U23 fyrr í haust, þar sem hann lyfti 326 kg samanlagt.
Fyrsta heimsmeistaramótinu í fullorðinsflokki fylgir mikil reynsla og má vænta þess að Þórbergur taki dýrmætan lærdóm úr keppninni með sér inn í næstu verkefni.
