Loka keppendalistinn fyrir NM unglinga er kominn á netið: http://painonnosto.fi/sites/default/files/liitetiedosto/final_entry_lists_nordic_championships_28-29_october_2017_pori_finland.pdf

Karen Rós Sæmundsdóttir sem búsett er í Noregi keppti í fyrsta sinn í lyftingum þar í landi á norska svæðismeistaramótinu og bætti hún metin í flokki kvenna 35-39ára í  -63kg þyngdarflokki með því að snara 70kg og jafnhenda 90kg. Áður voru metin í eigu Svanhildar Nönnu Vigfúsdóttur sett árið 2013.

Tristan Andri Karenarson (15 ára) keppti líka á sýnu fyrsta móti en hann snaraði 69kg og jafnhenti 83kg en hann vigtaðist aðeins 69,10kg í -77kg flokkinn. Metin í flokki 15 ára og yngri í -69kg flokk er 73kg í snörun í eigu Brynjars Ara Magnússonar (13 ára) og 90kg í eigu Guðmundar Högna Hilmarssonar frá 2011 svo Tristan heggur nokkuð nærri þeim.

http://results.lsi.is/meet/norska-svaedismeistaramotid-2017

Ísland keppti á móti Ísrael í landskeppni í dag þar sem þrír keppendur af hvoru kyni kepptu í Sinclair stiga keppni. Hugmyndin af mótinu er sprottin undan því að núna hefur WOWAIR hafið beint flug til Tel Aviv og voru þeir einn af styrktaraðilum mótsins. Mótið var haldið fyrir lokagrein á stóru crossfit móti í Tel Aviv og var utandyra í sólinni. Einnig er mótið undirbúningur fyrir keppendur sem keppa á HM í lyftingum í lok Nóvember.

Ísrael fór með sigur í samanlagðri keppninni með fyrnasterkum körlum og setti m.a. Artur Mugurdumov Ísraelskt met í jafnhendingu í -105kg flokki þegar hann jafnhenti 197kg. Litlu máttu þó muna að þeirra sterkasti keppandi Igor Olshaneski dyttu úr keppni í snörun en hann lyfti opnunarþyngd sinni í þriðju tilraun.

Kvennaliðið okkar vann þó hið Ísraelska og Þuríður Erla Helgadóttir varð stigahæst kvenna með 247,6 stig en hún snaraði 80kg og jafnhenti 105kg. En bæði Þuríður og Sólveig fóru með allar sínar lyftur í gegn og Aníta Líf allar snaranir en þær munu allar keppa á HM í Bandaríkjunum mánaðarmótin Nóvember/Desember.

Sólveig Sigurðardóttir setti nýtt íslandsmet í -75kg flokk kvenna en hún vigtaðist létt í flokkin (69.5kg) og jafnhenti 107kg sem var bæting á meti Ragnheiðar Söru Sigmundsdóttur um 2kg sett árið 2015 og bæting á metinu í samanlögðum árangri um 4kg. Einar Ingi Jónsson jafnaði Íslandsmetið í snörun í -77kg flokki þegar hann snaraði 117kg, og var það nýtt met í flokki 23 ára og yngri. Hann reyndi einnig við 120kg.

Sjá umfjöllun um mótið á ísraelska vefnum snatcher: https://www.snatcher.co.il/מאמרים/הרמת-משקולות-אולימפיות/איסלנד-נגד-ישראל-בהרמת-משקולות-התוצאו/

Ísland KVK = 711,5 Stig
Ísland KK = 969,1 Stig
Ísland Samanlagt = 1681 Stig

Ísrael KVK = 690,3 Stig
Ísrael KK = 1126,7 Stig
Ísrael Samanlagt = 1817 Stig

Besta KVK = Þuríður Erla Helgadóttir 274,6 stig (80/105)
Besti KK = Artur Mugurdumov 389,2 stig (150/205)

Sex manna lið frá Íslandi keppir á föstudaginn (20.Október) í Tel Aviv í landskeppni milli Íslands og Ísraels í ólympískum lyftingum. Mótið er haldið í tengslum við stórt liða crossfit mót sem heitir Affiliate Cup og verður mótið fyrir loka greinina í mótinu. Valið var í lið Íslands útfrá árangri á árinu 2017 og er liðið skipað eftirfarandi:

Karlar:
Einar Ingi Jónsson (LFR)
Ingólfur Þór Ævarsson (KFA)
Daníel Róbertsson (Ármann)

Konur:
Þuríður Erla Helgadóttir (Ármann)
Sólveig Sigurðardóttir (LFR)
Aníta Líf Aradóttir (LFG)

Þjálfari með hópnum er Árni Freyr Bjarnason.

Mótið verður góður undirbúningur fyrir Þuríði, Sólveigu og Anítu en allar eru þær skráðar til leiks á HM í lok Nóvember sem fram fer í Anaheim í Kaliforníu.

Haustmóti LSÍ lauk í dag en mótshaldari var Lyftingafélagið Hengill í Hveragerði og stóðu þau sig með stakri prýði.

Heildarúrslit má nálgast í afreksgagnagrunninum:http://results.lsi.is/meet/haustmot-lsi-2017

Topp 3 KVK

Freyja Mist Ólafsdóttir (LFR) 90/105  – 226,4 Sinclair stig
Viktoría Rós Guðmundsdóttir (LFG) 71/90 – 205,2 Sinclair stig
Rakel Hlynsdóttir (Hengill) 73/90 – 203,9 Sinclair stig

Topp 3 KK

Bjarmi Hreinsson (LFR) 136/150 – 322,6 Sinclair stig
Guðmundur Steinn Gíslason Kjeld (LFA) 109/136 – 303,7 Sinclair stig
Birkir Örn Jónsson (LFG) – 105/142 – 298,7 Sinclair stig

34 keppendur hófu keppni 22 í kvennaflokki og 12 í karlaflokki. Matthías Abel Einarsson (Hengill) bætti snöru metið í öllum flokkum í -63kg flokki þegar hann snaraði 69kg. Einar Ísberg (Hengill) bætti íslandsmetið í flokki 15 ára og yngri -62kg flokki þegar hann jafnhenti 72kg og 76kg, það voru líka met í samanlögðum árangri. Að lokum bætti Agnes Ísabella Guðmundsdóttir (LFH) íslandsmet 15 ára og yngri í -53kg flokki kvenna þegar hún jafnhenti 48kg.

Liðakeppni mótsins

Staðan í Liðabikar LSÍ fyrir lokamótið (Jólamótið) má sjá hér að neðan og ljóst er að nýtt lið mun vinna bikarinn en Lyftingadeild Ármanns hefur unnið bikarinn síðastliðin tvö ár.

Liðabikar 2017 (eftir 2/3)

Alþjóðalyftingasambandið (IWF) hefur tilkynnt að þær níu þjóðir sem voru með þrjú eða fleiri jákvæð lyfjaprófssýni frá endurprófunum á ólympíuleikunum 2008 og 2012 munu verða settar í eins árs bann frá allri keppni í ólympískum lyftingum og hefst bannið um miðjan Október í ár. Það þýðir að þessar þjóðir verða ekki meðal keppanda á Heimsmeistaramótinu í ólympískum lyftingum sem hefst í lok Nóvember  í Anaheim  (Kaliforníu) og verður Ísland meðal þátttökuþjóða með 4-6 keppendur.

Úr endurprófununum voru 49 jákvæð sýni og meðal þeirra fjölmargir verðlaunahafar frá leikunum tveimur. Illya Ilyin frá Kasakstan líklegast stærsta nafnið í lyftingaheiminum en hann vann gullverðlaun í Bangkok og London ásamt því að vera fjórfaldur heimsmeistari í greininni.

Löndin níu og fjöldi jákvæðra sýna er eftirfarandi:

Rússland (10)
Kazakstan (10)
Hvíta-Rússland (7)
Azerbajan (5)
Armenía (4)
Tyrkland (3)
Úkraína (3)
Kína (3)
Moldova (3)

Kína og Rússland hafa unnið flest verðlaun á stórmótum í ólympískum lyftingum síðustu árum og mun þetta án efa hafa mikil áhrif á röðun efstu sæta. Mótin sem öll löndin níu missa af eru eftirfarandi:

HM í lyftingum, Nóvember 2017
Ólympíuleikar Æskunnar 2018
HM Unglinga 2018
Asíuleikarnir 2018
Evrópumeistaramótið 2018
Aðrar álfukeppnir 2018

Fréttatilkynning IWF: http://www.iwf.net/2017/09/30/iwf-executive-board-upholds-decision-related-to-member-federations-which-have-produced-three-or-more-retesting-cases/

Frétt insidethegames: https://www.insidethegames.biz/articles/1056018/one-year-bans-keep-china-russia-and-seven-others-out-of-weightlifting-world-championships

Listi yfir keppendur frá endurprófunum: http://www.iwf.net/anti-doping/reanalysis/

Katla Björk Ketilsdóttir UMFN keppti í dag fyrir hönd Íslands á Evrópumeistaramótinu í ólympískum lyftingum 17 ára og yngri sem fram fer í Kósavó. Katla átti frábært mót og bætti sinn besta árangur um 12 kg í samanlögðum árangri sem tryggði henni 5.sæti af 13 keppendum í -63kg flokki aðeins 1kg á eftir keppandanum í fjórða sæti.

Katla hóf keppni á 72kg í snörun, því næst fór hún í 75kg sem hún klikkaði á en í lokatilraun fór hún í 77kg sem var tilraun við nýtt norðurlandamet í -63kg flokki kvenna 17 ára og yngri. Katla lyfti þeirri þyngd með glæsibrag og bætti þar með um ársgamalt met hinnar sænsku Ölvu Cederholm 76kg, 77kg hjá Kötlu var bæting á hennar eigin íslandsmeti um 4kg frá því fyrr í sumar.

Í jafnhendingunni þá byrjaði Katla á 82kg, því næst fór hún í 85kg og loks í 88kg, en bæði 85kg og 88kg voru ný íslandsmet, samanlagður árangur því 165kg.

Katla verður í eldlínunni í lok Október þegar 12 íslenskir keppendur fara á Norðurlandamót Unglinga 20 ára og yngri og 17 ára og yngri í Pori í Finnlandi.

—

Hægt er að sjá norðurlandametið hjá Kötlu frá mínútu 56:43 í útsendingu frá mótinu sem og aðrar lyftur: https://www.youtube.com/watch?v=0Q3C8Q6qb2c

—

Nánari útlistun á árangri Kötlu má sjá í gagnagrunni lyftingasambandsins: http://results.lsi.is/lifter/katla-bjork-ketilsdottir

Tvö ný lyftingafélög hafa verið tekin inn í LSÍ og ÍSÍ.

Lyftingafélag Austurlands sem er staðsett í Crossfit Austur á Egilstöðum og héldu þau unglingalandsmóts hlutann í ólympískum lyftingum í sumar. Á nýafstöðnu Íslandsmeistaramóti Unglinga þá keppti fyrsti keppandi undir þeirra merkjum; Bjartur Berg Baldursson.

Lyftingafélag UMFS Selfoss hefur verið endurstofnað og er það til húsa í Sportstöðinni á Selfossi og eiga þeir enn eftir að senda sinn fyrsta keppanda á mót en Árni Steinarsson útskrifaðist sem dómari í Ágúst.

Heildarúrslit:http://results.lsi.is/meet/islandsmeistaramot-unglinga-u17-og-u20-2017

Íslandsmeistaramót Unglinga fór fram í gær (9.September) í húsakynnum Lyftingafélags Reykjavíkur/Crossfit Reykjavík. Fjörutíu keppendur hófu keppni og voru fjöldi íslandsmeta í unglingaflokkum sett af báðum kynjum. Lyftingasambandið biður keppendur og dómara afsökunar á miklum seinkunum sem urðu á tímaseðli.

Stigahæstu keppendur voru eftirfarandi:
Konur 17 ára og yngri: Katla Ketilsdóttir UMFN 205,2 Sinclair stig 71kg í snörun og 82kg í jafnhendingu sem tryggði henni nýtt Íslandsmet samanlögðum árangri bæði 17 ára og yngri og 20 ára og yngri í -63kg flokki.

Karlar 17 ára og yngri: Veigar Ágúst Hafþórsson LFH 257 Sinclair stig 100kg í snörun og 120kg í jafnhendingu. Snörunin var Íslandsmet í flokki 17 ára og yngri -94kg og bæting á eldra meti um 3kg sem var í eigu Veigars.

Konur 20 ára og yngri: Birna Aradóttir LFR 212,8 Sinclair stig, 75kg í snörun og 83kg í jafnhendingu. 75kg í snörun var nýtt íslandsmet í flokki 20 ára og yngri og hún bætti einnig metið í samanlögðum árangri.

https://www.instagram.com/p/BY1STpaFgVB/?hl=en&taken-by=birnaaradottir

Karlar 20 ára og yngri: Arnór Gauti Haraldsson LFH 309,5 Sinclair stig. Arnór lyfti 122kg í snörun og 136kg í jafnhendingu. Hann labbaði í burtu með 8kg bætingu á samanlögðum árangri.

Fjöldamörg íslandsmet voru sett og þá sérstaklega í léttari flokkum. Hrafnhildur Arnardóttir (LFK) og Tinna María Stefnisdóttir (LFR) settu báðar mörg met í -48kg flokki 17 ára og yngri. Agnes Ísabella Guðmundsdóttir (LFH) og Úlfhildur Unnarsdóttir (LFG) sömuleiðis met í -53kg flokki 17 ára og yngri. Álfrún Tinna Guðnadóttir (LFR) bætti metin í -63kg flokki 15 ára og yngri og sömuleiðis Birta Líf Þórarinsdóttir (LFR) í -69kg flokki 15 ára og yngri.

Hjá körlunum voru það Kristófer Guðmundsson (LFG) og Borgþór Jóhannson (LFG) sem skiptust á að bæta metin í -50kg flokk 17 ára og yngri. Einar Ísberg (Hengill) og Rökkvi Guðnason (LFR) settu báðir nokkur met í -56kg flokk 17 ára og yngri. Matthías Abel Einarsson (Hengill) bætti met í öllum unglingaflokkum í -62kg flokki.

Loks keppti Freyja Mist Ólafsdóttir LFR sem gestur og bætti sitt eigið íslandsmet í -90kg flokki kvenna þegar hún snaraði 92kg sem er jafnframt þyngsta snörun sem lyft hefur verið á Íslandi. Hún bætti líka metið í samanlögðum árangri með því að lyfta 104kg í jafnhendingu.

Íslandsmeistarar voru eftirfarandi:
17 ára og yngri KVK:
-48kg
Hrafnhildur Arnardóttir LFK 28+43=71kg
-53kg
Agnes Ísabella Guðmundsdóttir LFH 38+45=83kg
-63kg
Katla Björk Ketilsdóttir UMFN 71+82=153kg
-69kg
Birta Líf Þórarinsdóttir LFR 50+65=115kg

17 ára og yngri KK:
-50kg
Kristófer Guðmundsson LFG 37+40=77kg
-56kg
Einar Ísberg Hengill 58+74=132kg
-62kg
Matthías Abel Einarsson Hengill 68+90=158kg
-69kg
Róbert Þór Guðmarsson LFH 70+95=165kg
-77kg
Brynjar Ari Magnússon LFH 80+100=180kg
-94kg
Veigar Ágúst Hafþórsson LFH 100+120=220kg

20 ára og yngri KVK:
-63kg
Birna Aradóttir LFR 75+83=158kg
-69kg
Margrét Þórhildur Jóhannesdóttir LFK 66+80=146kg
-75kg
Vigdís Hind Gísladóttir Hengill 46+55=101kg
-90kg
Birta Hafþórsdóttir LFH 73+87=160kg

20 ára og yngri KK:
-69kg
Guðjón Alex Flosason Hengill 83+101=184kg
-77kg
Jón Kaldalóns Björnsson LFR 104+131=235kg
-85kg
Arnór Gauti Haraldsson LFH 122+136=258kg
-105kg
Sigurjón Guðnason LFR 104+127=231kg
+105kg
Ingvi Karl Jónsson Ármann 98+110=208kg

Vegna fjölda áskorana hefur stjórn lyftingasambandsins samþykkt viðauka við mótareglur sem tekur til Unglingalandsmóts UMFÍ, Íslandsmeistaramóts Unglinga og innanfélagsmóta

Viðauki við mótareglur [*.pdf]

Viðauki við mótareglur LSÍ

1.gr Notkun stanga og opnunarþyngdir

Keppendur 15 ára og yngri mega á Unglingalandsmóti UMFÍ, Íslandsmeistaramóti Unglinga og á innanfélagsmótum nota eftirfarandi keppnisstangir kjósi þeir það:

15 ára og yngri KK: 15kg kvenna keppnisstöng, lágmarks opnunarþyngd 21kg (stöng + 2.5kg + klemmur)

15 ára og yngri KVK: 10kg tækni stöng, lágmarks opnunarþyngd 16kg (stöng + 2.5kg + klemmur)

Aðrir keppendur þessara móta þurfa að nota eftirfarandi stangir
16-20 ára KK: 20kg karla keppnisstöng, lágmarks opnunarþyngd 30kg (stöng, 2.5kg + lásar)

16-20 ára KVK: 15kg kvenna keppnisstöng, lágmarks opnunarþyngd 25kg (stöng, 2.5kg + lásar)

Á öðrum mótum lyftingasambandsins gilda þær reglur að allir karlar nota 20kg stöng og allar konur 15kg stöng. Lágmarks opnunarþyngdir eru þá 30kg hjá körlum og 25kg á konum.

Á RIG, Íslandsmeistaramótinu og öðrum alþjóðlegum mótum er lágmarksopnunarþyngd 45kg hjá körlum (stöng + 10kg plötur + 2.5kg lásar) og lágmarks opnunarþyngd hjá konum 40kg (stöng + 10kg plötur + 2.5kg lásar).

Mælst er til þess að á Íslandsmeistaramóti Unglinga 2018 og síðar sé keppt í U20, U17 og U15.

2.gr Vigtun keppenda

Á mótum þar sem keppt er í þyngdarflokkum hljóta keppendur 15 ára og yngri keppnisrétt í þeim flokki sem þeir vigtast inn í, ef þeir eru of léttir fyrir skráðan flokk fara þeir niður um flokk og ef þeir eru of þungir fyrir skráðan flokk fara þeir upp um flokk.

16-20 ára þurfa að vigtast inn í þann flokk sem þeir eru skráðir í á mótum sem keppt er í þyngdarflokkum annars fyrirgera þeir rétti sínum til að keppa.

Samþykkt á stjórnarfundi 5.9.2017