Þórbergur Ernir Hlynsson lauk keppni í dag í -110 kg flokki með sóma. Þórbergur náði frábærum árangri þar sem hann bætti meðal annars Íslandsmet fullorðinna í snörun um 3 kg er hann lyfti 148 kg í þriðju lyftu. Áður hafði hann misst fyrstu lyftu við 143 kg en fór svo létt með sömu þyngd í annarri lyftu. Hann byrjaði örugglega í jafnhendingu á 172 kg og fór þaðan í 178 kg sem fóru upp. Á þessum tímapunkti var hann búinn að bæta Íslandsmetið fullorðinna í snörun í -110 kg flokki um 3 kg sem og Íslandsmet fullorðinna í samanlögðun árangri í -110 kg flokki um 1 kg eða 326 kg. Síðasta lyftan við 184 kg var fyrir nýju Íslandsmeti í jafnhendingu en því miður fór hún ekki upp.

Frábær árangur hjá Þórbergi sem er á góðu skriði fyrir heimsmeistaramótið sem fer fram í Kína mánaðarmótin október/nóvember.