Í dag fór sumarmót Lyftingasambands Íslands og Lyftingadeildar KA fram í KA heimilinu á Akureyri. Mótið heppnaðist mjög vel og eiga KA menn hrós skilið fyrir góða umgjörð og skipulag.

Mótið var sinclair-stigamót m.v. 2020-2024 sinclair-reiknireglu, en hún er ekki að fullu sambærileg við þau stig sem gefin eru upp á results.lsi.is

13 konur í tveimur riðlum og 7 karlar í einum riðli kepptu í dag.
Heildarúrslit má finna á https://results.lsi.is/meet/sumarmot-lsi-2023

Amalía Ósk Sigurðardóttir sigraði  í kvennaflokki með 230,51 sinclair stig.
Erla Ágústsdóttir var í öðru sæti með 211,91 sinclair stig.
Telma Rún Guðjónsdóttir var í þriðja sæti með 195,67 sinclair stig.

Hjá körlunum var hörð og spennandi keppni
Sigurður Darri Rafnsson sigraði með 361,41 sinclair stig.
Brynjar Logi Halldórsson var í öðru sæti með 359,22 sinclair stig.
Axel Guðni Sigurðsson var í þriðja sæti með 345,73 sinclair stig.

Það var virkilega gaman að sjá Amalíu koma svona sterka til baka en töluvert er síðan hún keppti síðast. Amalía opnaði með 70 kg snörun, missti 75 kg sem hún svo tók í þriðju tilraun. Í C&J lyfti hún 90 kg – 95 kg  og 100 kg, svo 175 kg total var niðurstaðan í dag. Hún stefnir ótrauð á Senior Heimsmeistaramót í September og það verður gaman að fylgjast með henni í framtíðinni.

Erla Ágústsdóttir átti frábæran dag en hún lyfti 88 kg í sinni fyrstu snörun, tók síðan 92 kg í annarri tilraun og setti með því U23 Íslandsmet og reyndi að lokum við 94 kg sem ekki vildu upp í dag, en það hefði verið jöfnun á Senior Íslandsmets standard. 
Í C&J tók hún 108 kg í fyrstu tilraun, í annarri tók hún 113 kg sem er U23 Íslandsmet og líkt og í snöruninni reyndi hún að jafna Senior Íslandsmets-standardinn og bað um 116 kg sem gengu því miður ekki. Niðurstaðan er samanlögð 205 kg sem gefa henni A lágmörk á NM Senior, B lágmörk á EM U23 og C lágmörk á EM Senior. Það má því segja að þessi frábæra lyftingakona hafi með þessu stimplað sig rækilega inn í landsliðið í dag.

Í karlaflokki voru tveir lyftarar fæddir 2007 að keppa á sínu fyrsta móti. Annar þeirra, Kristinn Þór Hilmarsson, vigtaðist inn í 67 kg flokk, átti gott mót og lyfti 6 gildum lyftum sem er alltaf frábært á fyrsta móti.

Mótið endaði svo á æsispennandi keppni en þrír gríðarsterkir keppendur vigtuðust allir inn í -89 kg flokk og tilkynntu svipaðar tölur í vigtun. Þeir voru þrír eftir þegar hinir fjórir keppendurnir höfðu lokið keppni.
Í snörun hóf svo Sigurður Darri Rafnsson leikinn með 125 kg snörun og Axel Guðni Sigurðsson lék svo þann leik á eftir honum. Axel fór því næst í 128 kg tilraun sem ekki vildi upp en hækkaði í 130 kg líkt og Sigurður hafði gert. Brynjar Logi Halldórsson hafði þá hækkað sig upp í 133 kg, svo næst átti Sigurðuri Darri leik og lyfti 130 kg og aftur lék Axel það sama á eftir honum. 

Þá var komið að Brynjari að opna með 133 kg sem fóru upp.  Sigurður Darri tók svo einnig 133 kg í sinni þriðju tilraun. Brynar Logi stóð þá einn eftir með tvær tilraunir uppi í erminni. Tók fallega 136 kg snörun í annarri tilraun og að lokum 138 kg snörun sem jafnframt er Senior Íslandsmet.

Spennan magnaðist svo þegar kom að jafnhendingarhlutanum. Þar hóf Axel leikinn hjá þeim þremur með 152 kg góðri lyftu, en náði svo því miður ekki annarri og þriðju tilraun upp í dag. Þá reyndi Brynjar við 155 kg en eitthvað lenti stöngin illa á honum og hann náði ekki að standa upp með stöngina. Sigurður Darri tók þá 155 kg í sinni fyrstu tilraun. Brynjar náði svo 155 kg í annarri tilraun. Hann hækkaði svo beint í 162 kg og Sigurður Darri fylgdi á eftir, en þar sem hann var á sinni annarri tilraun var það hann sem fyrst mætti á pallinn og henti upp nýju 162kg Íslandsmeti í C&J. Þá hækkaði Brynjar í 163 kg, stóð upp með það, en jerkið vildi ekki upp í dag.
Að endingu setti Sigurður Darri allt sitt í síðustu lyftuna 164 kg sem fóru upp við mikinn fjögnuð viðstaddra og hans sjálfs og  bætti þar sitt eigið Íslandsmet í jafnhendingu og einnig samalagða Íslandsmetið um 2 kg eða samtals 297kg.  Með þessu er hann einnig kominn með C lágmörk á Senior HM, B lágmörk á Senior EM og A lágmörk á Senior NM.
Það má því með sanni segja að hann hafi verið maður dagsins í dag.

Að lokum er gaman að geta þess að tveir einstaklingar þau Heiðrún Frímannsdóttir og
Snorri Arnaldsson þreyttu dómarapróf á mótinu.

Við þökkum Lyftingadeild KA fyrir frábært mót, framúrskarandi útsendingu og gott skipulag.

Myndir: Egill Bjarni Friðjónsson

Mótið fer frá í KA heimilinu, Dalsbraut 1 – vigtun á mótsstað.

Athugið að mótið er Sinclair stigamót og því þarf íþróttafólk ekki að ná vigt í ákveðnum flokki, en afrek þess skráist í þann flokk sem það vigtast í.

Athugið að mótakerfið okkar notast við Sinclair Coefficient 2021-2024,
en á www.results.is er Sinclair Coefficient 2017-2021 notaður og því getur verið munur á stigum þar á milli.
Lágmarkareglur til að ávinna sér keppnisrétt á mótum erlendis miðast við eldra sinclair kerfið.

Konur  Hópur 1 – kl. 10:00

Nafn                                  Flokkur    Entry total

Hólmfríður Bjartmarsdóttir       71                 75

Ingibjörg Embla M. Jónsdóttir   71                 98

Perla Karen Gunnarsdóttir        71               100

Rakel Sara Snorradóttir             71                 70

Steindís Elín Magnúsdóttir        71                 82

Þórdís Viðarsdóttir                    45                 55

Konur  Hópur 2 – kl. 12:00

Nafn                                  Flokkur    Entry total

Amalía Ósk Sigurðardóttir         64               175

Bríet Anna Heiðarsdóttir           64               140

Erla Ágústsdóttir                      >87               200

Freyja Björt Svavarsdóttir          59               120

Hildur Marín Bjarnadóttir         71               140

Selma Gísladóttir                       76               155

Steinunn Soffía Hauksdóttir      64               115

Thelma Rún Guðjónsdóttir        59               140

Karlar  Hópur 1 – kl. 14:30

Nafn                              Flokkur  Entrytotal                  

Axel Guðni Sigurðsson              89               280

Bjarki Breiðfjörð Björnsson       81               260

Bjarki Freyr Sturluson               67                 70

Brynjar Logi Halldórsson           89               280

Kristinn Þór Hilmarsson             67                 70

Ögri Harðarson                          89                   0

Sigurður Darri Rafnsson            89               290

Suthaphat Saengchueapho       96               200

Tindur Eliasen                            89               241

Eygló átti sögulega stund á IWF Grand Prix 1, Havana, Cubu í gær þegar hún snaraði 100 kg fyrst allra Íslenskra kvenna á móti.

Hún náði 120 kg í jafnhendingu og samanlögðum 220 kg sem einnig er Íslandsmet í samanlögðu.
Þessi árangur gerir hana að stigahæstu lyftingakonu Íslands frá upphafi með 269,56 sinclair stig.

Alls voru 26 keppendur í -71 kg flokki á mótinu, 14 á A riðli og 12 í B riðli.
Eygló keppti í B riðli. Þar átti hún bestan árangur keppenda í snörun, 100 kg og annan bestan árangur í jafnhendingu 120 kg á eftir Marcial Matias, DOM, sem lyfti 124 kg.

Eygló gekk virkilega vel í snörunar hlutanum. Hún opnaði með 94 kg, tók næst 97 kg og toppaði þetta með 100 kg Íslandsmeti í þriðju lyftu.

Í jafnhendingunni opnaði hún með 117 kg. Dómararnir gáfu henni tvö hvít og eitt rautt, en kviðdómur sneri dómnum í ógilda lyftu vegna hreyfingar í olgnboga. Hún tók því næst góða 120 kg lyftu og reyndi að lokum við 122 kg, stóð upp úr clean-inu en jerkið vildi ekki alveg upp í þetta sinn. En 120 kg gerðu 220 kg Íslandsmet í samanlögðu.
Keppni í B riðlið má sjá hér

Við tók bið eftir úrslitum A riðils til að sjá hver heildarúrslitin væru því ekki var mikill munur á mörgum keppendum A og B riðils m.v. entry total.
Keppni í A riðli má sjá hér

Eftur að A riðlinum lauk var ljóst að 7. sætið var Eyglóar en auk þess sem hún var í 6. sæti í snörun og 9. sæti í jafnhendingu.

Úrslit mótsins í heild má finna hér.

Fjölmiðlar gerðu afrekum Eyglóar góð skil og má finna fréttir í meðfygjandi linkum.
Íþróttafréttir RUV
ruv.is
mbl.is
dv.is

Á morgun 14. júní kl. 17:00 á Íslenskum tíma mun Eygló Fanndal Sturludóttir keppa á IWF Grand Prix I á Havana, Cubu.

Mótið er eitt af “Olympic qualifier” mótum IWF og mikilvægur liður í því ferli Eyglóar, landsliðsþjálfarans Inga Gunnars og Lyftingasambandsins að vinna henni inn keppnisrétt á Ólympíuleikunum.
Hún keppir í B-riðli ásamt 11 öðrum keppendum og hægt er að fylgjast með keppninni á youtoube rás IWF.

A-riðillinn keppir svo kl. 22:00 á Íslenskum tíma og þar eru 14 keppendur svo það er í raun ekki fyrr en eftir hann sem við vitum í hvaða sæti Eygló lendir.

Besti árangur Eyglóar í kílóum talið hingað til eru samanlögð 217 kg sem hún náði á Evrópumeistaramóti U23 í október á síðasta ári og varð með því Evrópumeistari.

Hún jafnaði svo þann árangur á Senior Evrópumeistaramóti á apríl síðastliðinn og varð þar í 6. Sæti.

Hennar besta snörun er 97 kg og besta jafnhending 121 kg og allt eru þetta Íslandsmet.

Við óskum Eygló alls hins besta á mótinu og hlökkum til að sjá hana lyfta á morgun.

Skráning

Skráningu lýkur 10. júní

Í gær lauk Íslandsmóti ungmenna 2023 sem Lyftingafélag Reykjavíkur hélt.

Keppt var í aldursflokkunum U15 – U17 – U20 og U23

Það var virkilega eftirtektarvert hversu fallegar lyftur yngstu iðkendurnir voru með í upphafi móts og greinilegt að þar er mikið efni í góða lyftara.

Heildarúrslit má finna á https://results.lsi.is/meet/islandsmeistaramot-unglinga-2023

Einnig má finna stórt safn af myndum frá keppninni á https://photos.app.goo.gl/XAKid8QrrZ61osQL9

Stigahæsta kona U15 var Hólmfríður Bjartmarsdóttir með 130 sinclair

Stigahæsta kona U17 var Guðrún Helga Sigurðurdóttir með 144,4 sinclair stig.
Hún setti einnig íslandsmet í jafnhendingu í U17 >81kg flokki með 79kg lyftu.

Stigahæsta kona U20 var Úlfhildur Arna Unnarsdóttir með 210,5 sinclair stig

Stigahæsta kona U23 var Guðný Björk Stefánsdóttir með 225,5 en fast á hæla hennar var Snædís Líf P. Dison með 225,4

Guðný Björk Stefánsdóttir setti einnig Íslandsmet í snörun í U23  76kg flokki þegar hún snaraði 90 kg í sinni þrijði snörun.

Engir karl keppendur voru í U15 og U 17

Stigahæsti karl U20 var Bjarki Breiðfjörð Björnsson með 305,0 sinclair stig

Stigahæsti karl U23 var Jóhann Valur Jónsson með 297,4 sinclair stig

Einnig er gaman að geta þess að Þorvaldur Hafsteinsson tók landsdómarapróf á mótinu.

Við þökkum öllum sem komu að mótinu. Lyfturum, dómurum, starfsfólki og Lyftingafélagi Reykjavíkur.

Hrund sigraði í -71 kg þyngdarflokki, 45-49 ára nokkuð örugglega með 165kg samanlagðri þyngd 19kg meira Elaine Sims sem varð í örðu sæti.

Hún opnaði með 68kg fallegri snörun. Elaine Sims frá Bretlandi reyndi svo við 69kg í  sinni þriðju og síðustu snörun, en það var tilraun til Evrópumets, en ekki vildi það upp í dag.
Hrund bað þá um 72kg á stöngina, en missti jafnvægið með stöngina og datt fram á hnén. 

Hún tók hins vegar 72kg örugglega í þriðju og síðustu tilrauninni sinni og sigraði með því snörunar hluta flokksins auk þess sem 72kg eru nýtt Evrópumet og jöfnun á Heimsmeti í flokkinum hennar. Hrund fagnanði að sjálfsögðu eins og henni er einni lagið.

Í jafnhendingu tók Hrund nokkuð örugglega 85kg í fyrstu lyftu. Elaine Sims var þá ein önnur eftir í flokknum og reyndi við 86kg í sinni annarri lyftu en tókst ekki að fara undir jerkið. Því næst tók Hrund sína aðra lyftu, 90kg. Dómararnir gáfu henni eitt rautt og tvö hvít, en kviðdómur snéri dómnum við og gaf henni ógilda lyftu sökum “pess out”. Sims fór þá í 92kg sem ekki vildu upp frekar en 86kg. Hrund bað þá um 93kg sem hún negldi upp með stæl og setti með því Evrópumet í jafnhendingu og samanlögðu, en þetta er einnig jöfnun á heimsmeti í jafnhendingu og samanlögðu. 

Íslendingar hafa þá lokið keppni á þessu Evrópumóti með frábærum árangri og við erum virkilega stolt af þessum keppendum.

Árdís Grétarsdóttir endaði í 3. sæti   í -64kg flokki 50-54 ára kvenna eftir harða keppni og æsispennandi tilraunir við bætingar á Evrópumeti sem hún setti í fyrstu jafnhendingu.

Hún opnaði með öruggri 50kg snörun, þyngdi því næst í 54kg sem fóru upp og endaði snörunina á að reyna við 56kg sem hún var hársbreidd frá að ná, en náði ekki að skella olnbogunum beint í lás og missti stöngina.
Hún var í 3. sæti eftir snörunina.

Í jafnhendingu byrjaði hún á 70kg lyftu, sem var Evrópumet í hennar flokki. Það stóð þó ekki lengi þar sem Mette Jespen frá Danmörku reyndi að bæta það í sinni fyrstu lyftu með 72kg tilraun sem ekki fór upp, en tók það svo í 2. tilraun. Okkar kona reyndi þá við 74kg en náði því miður ekki að halda lásnum og missti þá lyftu. Hún hækkaði þá í 75kg sem vildu ekki upp í dag. Mette tók svo þá þyngd og setti með því Evrópumet bæði í jafnhendingu og samanlögðu.
Norðurlöndin deildu svo verðlaunapallinum, Ísland í 3. Sæti, Svíþóð í 2. Sæti og Danmörk í því 1. 

Glæsilegur árangur hjá Árdísi á hennar fyrsta stórmóti og aðeins öðru móti hennar í Ólympískum lyftingum.

Helga Hlín Hákonardóttir sigraði á Evrópumeistaramóti Masters í  -59kg flokki 50-54 ára nokkuð örugglega með 121kg í samanlögðu. 14 kílóum betri samanlögð þyngd en spænski keppinautur hennar sem hafnaði í öðru sæti.
Hún hóf keppni síðust allra í sínum hópi, þegar allir aðrir keppendur höfðu lokið keppni.
Hún opnaði með 51kg snörun sem vildi ekki alveg upp. Hún tók svo 51kg alla leið í annarri tilraun.  Í þriðju tilraun reyndi hún við 55kg sem ekki vildu upp í dag.

Í jafnhendingu lyfti hún einnig síðust eftir að allir aðrir keppendur höfðu lokið keppni.
65kg á stöngina sem fóru örugglega upp og Evrópumeistaratitillinn í höfn.
Í annarri lyftu fóru 70kg upp og að lokum reyndi hún við 73kg sem ekki vildu upp í dag.

Helga Hlín Hákonardóttir keppir 15. maí kl. 11:00 að Íslenskum tíma.
Árdís Grétarsdóttir keppir 15. maí kl. 12:45 að Íslenskum tíma.
Hrund Scheving keppir 16. Maí kl. 11:45 að Íslenskum tíma.

Upplýsingar um mótið er að finna á Facebook-síðu mótsins
https://www.facebook.com/groups/1124024938549802

Útsending er á YouTube rás Weightlifting Ireland
https://www.youtube.com/@weightliftingireland7313/streams

Helga Hlín Hákonardóttir keppir í -59 kg  þyngdarflokki, 50-55 ára.
Helga Hlín er 51 árs lögfræðingur sem byrjaði að æfa CrossFit árið 2009 og hefur nokkrum sinnum keppt í CrossFit á Íslandi og erlendis. 

Á árunum 2013-2018 var hún meira og minna frá æfingum og keppni vegna brjósklosa í baki. Árið 2019 færði hún sig svo alfarið yfir í Ólympískar lyftingar. Árangurinn lét ekki á sér standa og varð Helga Hlín Evrópumeistari í sínum flokki árið 2020. Hún þakkar ekki síst lyftingunum ótrúlegan bata sem hún hefur náð undir dyggri leiðsögn eiginmanns síns Unnars Helgasonar Osteópata og þjálfara.

Helga Hlín hefur keppt á nokkrum heims-, Evrópu- og Íslandsmótum og einu móti í Svíþjóð þegar hún var búsett þar. Síðasta mót sem hún tók þátt í var heimsmeistaramótið 2022 sem haldið var í Flórída. Þar vann Helga Hlín til silfurverðlauna.
Helga Hlín er jafnframt formaður Lyftingasambands Íslands og er hún fyrsta konan til að gegna því embætti á Íslandi.

Árdís Grétarsdóttir keppir í – 64 kg þyngdarflokki, 50 – 55 ára kvenna.

Árdís er 51 árs leikskólakennari og L1 Crossfit þjálfari og er að keppa á sínu fyrsta stórmóti í Ólympískum lyftingum. Hún byrjaði í Crossfit árið 2012 og hefur stundað það af miklum krafti síðan og meðal annars orðið Íslandsmeistari í sínum flokki í nokkrum sinnum. 

Í janúar á þessu ári ákvað hún að snúa sér alfarið að ólympískum lyftingum með það að markmiði að ávinna sér þátttökurétt á Evrópumóti í masters flokki 2023. Það tókst og setti Árdís meðal annars 4 Íslandsmet á Íslandsmeistaramóti 2023. Hún keppir nú í fyrsta sinn á lyftingamóti erlendis fyrir Íslands hönd. 

Hrund Scheving sem einnig keppir á Evrópumótinu hefur leiðbeint og þjálfað Árdísi sem veit fátt skemmtilegra en að lyfta stöng í góðum félagsskap.

Hrund Scheving keppir í -71 kg þyngdarflokki, 45-50 ára.

Hrund er 45 ára lærður lýðheilsufræðingur. Hún starfar sem Crossfit þjálfari hjá Crossfit Sport, vinnur sem viðburðastjóri hjá Eventum og aðstoðar við rekstur á fjölskyldu veitingastaðnum Gamla fjósinu.

Hrund æfði fimleika á sínum yngri árum í Vestmannaeyjum  og handbolta á unglingsárum. 

Árið 2007 fór hún að æfa crossfit og hefur meðal annars keppt fjórum sinnum á regional (evrópumótinu í crossfit).  Árið 2017 fór hún að leggja meiri áherslu á Ólympískar lyftingar. Árið 2018 varð hún bæði evrópu og heimsmeistari í sínum þyngdar- og aldurs flokki og sló þrjú 18 ára gömul heimsmet sem enn standa þar sem þyndarflokkunum var breytt árið á eftir og enginn möguleiki að slá þau út.
Hún stefnir að sjálfsögðu á fleiri heimsmet á þessu móti.

Hrund er sannur íþróttaþróttaálfur og sá fyrst á Íslandi en leikritið Latibær var fyrst sett upp af Leikfélagi Vestmannaeyja árið 1996 og lék Hrund þar íþróttaálfinn.