Stjórn LSÍ samþykkti landsliðsviðmið fyrir 2026 á síðasta stjórnarfundi og nálgast má þau hér á heimasíðunni undir Lög og reglugerðir

Einnig var samþykktar breytingar á íslandsmetum í fullorðinsflokk og metin lækkuð sem nemur 10 Q-stigum í kvennaflokk og 12 Q-stigum í karlaflokk. Öll met verða endurreiknuð frá 1.Júní 2025. Sjá nýja met standarda hér að neðan (endurreiknun á results.lsi.is mun birtast á næstu dögum):

Sjá frétt frá ÍBR: https://www.ibr.is/frettir/i%C3%BErottafolkrvk2025

Breytt fyrirkomulag var í ár þar sem einungis er verðlaunað einn íþróttamann en ekki karl/konu/kvár líkt og 2024.

Í frétt ÍBR segir:

Íþróttafólk Reykjavíkur heiðrað við hátíðlega athöfn í Ráðhúsi Reykjavíkur

Athöfn íþróttafólks Reykjavíkur fór fram við hátíðlegar aðstæður í Ráðhúsi Reykjavíkur í kvöld, þar sem framúrskarandi árangur reykvískra íþróttamanna og liða á árinu 2025 var heiðraður. Fjölmenni var viðstatt þegar verðlaun voru veitt í helstu flokkum og ljóst að árið hefur verið einstaklega árangursríkt í íþróttalífi borgarinnar.

Eygló Fanndal Sturludóttir íþróttastjarna Reykjavíkur 2025

Eygló átti stórkostlegt ár þar sem Evrópumeistaratitill fullorðinna er sá árangur sem hæst ber að nefna. Þar kom hún, sá og sigraði og fyrir þann árangur var hún líka valin önnur besta er kemur að heildarstigum óháð þyngdarflokki. Hún er fyrsti íslendingurinn til að verða Evrópumeistari í ólympískum lyftingum fullorðinna.  Fyrr á árinu varð hún Íslandsmeistari í 5. sinn í röð og svo tryggði hún sér einnig 1. sæti á Smáþjóðamótinu.

Við óskum Eygló til hamingju með árangurinn sem og öllum þeim sem tilnefnd voru.

Stjórn LSÍ hefur valið lyftingafólk ársins, líkt og fyrri ár samkvæmt 18. grein í lögum LSÍ.

Lyftingakona ársins:

Eygló Fanndal Sturludóttir (f. 2001) – Lyftingafélag Reykjavíkur

• Eygló varð Evrópumeistari kvenna í -71 kg flokki á Evrópumeistaramótinu sem haldið var í Chisinau í Moldóvu í apríl 2025.
• Þar lyfti hún 109 kg í snörun, 135 kg í jafnhendingu og því 244 kg í samanlögðum árangri. Þessi árangur er einstakur í sögu lyftinga á Íslandi en aldrei hefur keppandi orðið Evrópumeistari eða unnið til verðlauna á stórmóti (EM/HM/ÓL) í lyftingum í opnum flokki.
• Fáir Íslendingar hafa orðið Evrópumeistarar í ólympískri íþrótt á sömu forsendum og keppt er í á Ólympíuleikunum.
• Hún varð 2. stigahæsti kvennkeppandinn af 167 keppendum frá 37 Evrópulöndum á mótinu þvert á þyngdarflokka út frá svokölluðum ROBI stigum með 688.6 stig sem er það stigakerfi sem Alþjóðalyftingasambandið notar á Heimsmeistaramótum og Evrópumeistaramótum.
• Zarina Gusalova frá Rússlandi varð önnur á eftir Eygló og keppti undir hlutlausum fána (AIN), Siuzanna Valodzka frá Hvíta-Rússlandi varð í þriðja sæti á mótinu en hún keppir einnig undir hlutlausum fána (AIN). Hún varð í fjórða sæti á ólympíuleikunum í París 2024.
• Sjá má upptöku RÚV af Evrópumeistaratitlinum hér: https://www.ruv.is/frettir/ithrottir/2025-04-17-eyglo-fyrsti-islenski-evropumeistarinn-441805
• Á tímabilinu sem valið er varð Eygló einnig í 4. sæti á Heimsmeistaramótinu 2024 í lyftingum sem fram fór í Bahrein. Þar endaði hún á eftir ríkjandi ólympíumeistara Olivia Reeves, norður-kóreskum keppanda Chun Hui Jong sem varð í öðru sæti og Kínverjanum Qiuxia Yang í þriðja sæti, allt stórþjóðir í ólympískum lyftingum.
• Eygló lyfti 107 kg í snörun og 132 kg í jafnhendingu, alls 239 kg á HM og endaði m.a. fyrir ofan silfurverðlaunahafann frá París 2024, Mari Sanchez, Kólumbíu.
• Þetta er besti árangur Íslendings á HM í ólympískum lyftingum.
• Eygló varð í 31. sæti í kvennaflokki á ROBI stigum á Heimsmeistaramótinu þvert á alla þyngdarflokka, 226 kvennkeppendur frá 75 löndum kepptu á mótinu. Fyrir ofan hana á stigum voru 9 norður-kóreskir keppendur, 8 kínverskir keppendur, 4 kólumbískir, svo einn frá Bandaríkjunum, Egyptalandi, Tæpei, Tælandi, Mongólíu, Dóminíska lýðveldinu, Nígeríu, Suður-Kóreu og Armeníu.
• Eygló varð Íslandsmeistari í -71 kg flokk og stigahæsti keppandinn þvert á þyngdarflokka.
• Eygló keppti með liði Íslands á Smáþjóðamótinu í ólympískum lyftingum þar sem hún náði einnig besta árangri mótsins með 106 kg í snörun og 130 kg í jafnhendingu, samtals 236 kg.
• Eygló bætti sig um 7 kg á tímabilinu og lyfti mest 244 kg og 299.23 Sinclair stig.
• Eygló setti 13 Íslandsmet á tímabilinu í fullorðinsflokki (bæði í -71 kg og -76 kg flokk) og 2 Íslandsmet í flokki 23 ára og yngri (á árinu 2024).
• Eygló setti 4 Norðurlandamet á tímabilinu í -71 kg flokk í snörun, jafnhendingu og samanlögðum árangri. Metið í jafnhendingu voru í eigu hinnar sænsku Patriciu Strenius sem varð Evrópumeistari 2018 í -69 kg flokk og 2022 í -71 kg flokk, í þriðja sæti á HM 2021 og í 4. sæti á ÓL 2020 í -76 kg flokki en Eygló átti sjálf metin í snörun og samanlögðum árangri.
• Nýir þyngdarflokkar tóku gildi 1. júní 2025 og á Eygló ennþá eftir að keppa í þeim en hún hefur verið frá vegna meiðsla og þurfti m.a. að draga sig úr keppni fyrir HM 2025 sem fram fór í Noregi.
• Wikipedia síða Eyglóar sem fer vel yfir feril hennar til þessa.

Lyftingakarl ársins:

Bergur Sverrisson (f. 1994) – Lyftingadeild Knattspyrnufélags Akureyrar (KA)

• Bergur keppti á fjórum mótum á tímabilinu en bestum árangri náði hann á Evrópumeistaramótinu í Chisinau í Moldóvíu þar sem hann endaði í13. sæti í -89 kg flokki.
• Bergur lyfti 140 kg í snörun og 162 kg í jafnhendingu, alls 302 kg samanlagt sem gáfu honum 365 Sinclair stig.
• Hann varð stigahæstur karlkeppenda á Jólamótinu 2024 með 140 kg í snörun og 160 kg í jafnhendingu, alls 364.2 Sinclair stig.
• Hann var í liði Íslands sem vann Smáþjóðamótið í ólympískum lyftingum.
• Hann keppti á Heimsmeistaramótinu í Förde í Noregi þar sem hann varð í 19. sæti í -88 kg flokki. Þar lyfti hann 135 kg í snörun og 158 kg í jafnhendingu.
• Bergur setti þrjú Íslandsmet á árinu.

Ungmenni ársins karlar flokkur 18-20 ára:

Þórbergur Ernir Hlynsson (f. 2005) – Lyftingafélag Reykjavíkur

• Þórbergur keppti á sex mótum á árinu, en árið var það síðasta í flokki 20 ára og yngri.
• Hann varð Norðurlandameistari í -110 kg flokki karla þar sem hann lyfti 141 kg í snörun og 178 kg í jafnhendingu, samanlagt 319 kg.
• Hann varð einnig stigahæstur allra karlkeppenda þvert á þyngdarflokka á Norðurlandamóti unglinga aðeins 0.6 stigum hærri en næsti keppandi Eliel Jännes frá Finnlandi. Afrek sem fáir ef einhver Íslendingur hefur náð í karlaflokki.
• Þessi árangur gaf honum 354,4 Sinclair stig og 371 Q-stig, q-stig eru nýleg stigaformúla sem hefur verið að riðja sér til rúms í lyftingum og er talin réttari en Sinclair stig. Bestu lyftarar á Norðurlandamótum eru reiknaðir í Q-stigum.
• Hann varð Íslandsmeistari í-102 kg flokki karla með 135 kg í snörun og 172 kg í jafnhendingu. Hann varð einnig stigahæstur allra karla á mótinu.
• Hann varð í 11. sæti á Heimsmeistaramóti unglinga í-102 kg flokki 20 ára og yngri og lyfti 140 kg í snörun og 163 kg í jafnhendingu, samtals 303 kg.
• Hann varð stigahæstur allra karla á Grétarsmótinu á Akureyri.
• Hann féll úr keppni á Evrópumeistaramóti unglinga í -110 kg flokki 20 ára og yngri eftir að hafa snarað 140 kg á opnunarþyngd 170kg.
• Þórbergur setti 3 íslandmet í fullorðinsflokki á tímabilinu, 15 Íslandsmet í flokki 20 ára og yngri og 15 Íslandsmet í flokki 23 ára og yngri.

Ungmenni ársins konur flokkur 18-20 ára:

Bergrós Björnsdóttir (f. 2007) – Lyftingafélag Reykjavíkur

• Bergrós keppti aðeins á einu móti á árinu, Grétarsmótinu þar sem hún varð stigahæst kvenna með 85 kg í snörun og 108 kg í jafnhendingu, samanlagt 193 kg í -77 kg flokki kvenna.
• Þessi árangur gaf henni 235.9 Sinclair stig
• Hún setti 9 Íslandsmet í flokki 20 ára og yngri og 6 Íslandsmet í flokki 23 ára og yngri.

Ungmenni ársins karlar flokkur 16-17 ára:

Kristófer Logi Hauksson (f. 2008) – Lyftingafélag Kópavogs

• Kristófer keppti á sex mótum á tímabilinu bæði í -89 kg flokki, -81 kg flokki og -88 kg flokki.
• Bestum árangri náði hann á Haustmóti LSÍ þar sem hann snaraði 100 kg og jafnhenti 116 kg, samtals 216 kg í -88 kg flokik sem gáfu honum 271,8 Sinclair stig.
• Hann vann silfur á Norðurlandamóti unglinga í -88 kg flokki karla 17 ára og yngri
• Hann setti 7 Íslandsmet í flokki 17 ára og yngri, 3 Íslandsmet í flokki 20 ára og yngri og 3 Íslandsmet í flokki 23 ára og yngri á tímabilinu allt í -88 kg flokki.

Ungmenni ársins konur flokkur 16-17 ára:

Steindís Elín Magnúsdóttir (f. 2008) – Lyftingafélag Reykjavíkur

• Steindís keppti á fjórum mótum á tímabilinu í -69 kg flokki og -71 kg flokki.
• Bestum árangri náði hún á Norðurlandamóti unglinga þar sem hún varð í 6. sæti í -69 kg flokki kvenna 17 ára og yngri með 6 4kg í snörun og 84 kg í jafnhendingu, samtals 148 kg og 185.5 Sinclair stig.
• Hún varð í 12. sæti á Evrópumeistaramóti 17 ára og yngri sem fram fór í Madrid á Spáni í -69 kg flokki þar sem hún lyfti 63 kg í snörun og 83 kg í jafnhendingu.
• Hún setti 7 Íslandsmet á árinu í -69 kg flokki kvenna 17 ára og yngri, 5 Íslandsmet í flokki 20 ára og yngri og 5 Íslandsmet í flokki 23 ára og yngri.

Ungmenni ársins flokkur 15 ára og yngri:

Theodór Einar Magnússon (f. 2010) – Lyftingafélag Reykjavíkur

• Theodór keppti á tveimur mótum á tímabilinu.
• Bestum árangri náði hann á Íslandsmeistaramóti unglinga þar sem hann varð í fyrsta sæti í -73 kg flokki 15 ára og yngri og lyfti 60 kg í snörun og 75 kg í jafnhendingu, samtals 135 kg og 191.9 Sinclair stig.
• Hann setti 9 Íslandsmet í -61 kg flokki 15 ára og yngri og 3 Íslandsmet í -73 kg flokki 15 ára og yngri á tímabilinu.

Ungmenni ársins flokkur 15 ára og yngri:

Úlfdís Silja Skúladóttir Waage (f. 2014) – Kraftlyftingafélag Akureyrar

• Úlfdís keppti á Páskamóti KFA í lyftingum í -49 kg flokki aðeins 11 ára gömul.
• Hún snaraði 12 kg og jafnhenti 15 kg, samtals 27 kg sem gáfu henni 43.7 Sinclair stig.

Katla Björk Ketilsdóttir keppti fyrst Íslendinga á HM í Förde í Noregi í gær í -63 kg flokki kvenna, Katla opnaði á 84 kg í snörun sem hún lyfti auðveldlega en missti síðan 87 kg og 88 kg í annari og þriðju tilraun. Í jafnhendingunni byrjaði hún á 100 kg sem hún klikkaði á en kom sterk til baka og lyfti 100 kg í annarri tilraun. Þriðja tilraun var við 104 kg, einu kg minna en hún lyfti á Evrópumeistaramótinu í apríl síðastliðnum. Árangur Kötlu dugði í 23. sæti af 33 keppendum.

Norður-Kóreu búinn Ri Suk varð í fyrsta sæti með ný heimsmet í flokknum 111 kg/142 kg, Kanadabúinn Maude Charron (silfurverðlaunahafi frá París 2024 í -59 kg flokk) var með silfur 103 kg/133 kg og Yenny Sinisterra Torres frá Kólumbíu þriðja með 103 kg/128 kg. Inka Tiainen frá Finnlandi var efst Norðurlandabúa í 16. sæti en hún snaraði 85 kg og 114 kg í jafnhendingu.

Hægt er að sjá lyfturnar frá Kötlu í íþróttafréttum RÚV: https://www.ruv.is/sjonvarp/spila/ithrottir/30657/b1cj2c/hm-i-lyftingum