Helga Hlín Hákonardóttir tók sinn móthluta í gær þann 26. maí í Gautaborg í Svíþjóð. Helga Hlín keppti í -59 kg flokki í Masters 45 og náði 54 kg í snörun, 71 kg í jafnhendingu og því 125 kg í samanlögðu með 227 Sinclair stig, en var þetta 13 kg bæting frá hennar besta árangri á móti. Þessi árangur færði Helgu Hlín 3. sæti í sínum aldurs og þyngdarflokki en var hún einungis einu kílói frá 2. sæti. 2021 World Masters Weightlifting Virtual Championship var aðeins þriðja mót Helgu Hlínar í lyftingum en hreppti hún titilinn sem Evrópumeistari 2020 í sínum aldurs og þyngdarflokki á sínu öðru móti.
Þess má geta að dóttir Helgu Hlínar, Úlfhildur Unnarsdóttir náði yfirburðar árangri á seinasta Norðurlandamóti unglinga og náði þar A-lágmörkum á EM U17 og HM U17 en æfa þær mægður saman undir þjálfun Unnars Helgasonar, eiginmanns Helgu Hlínar og föður Úlfhlidar. Hlökkum við mikið til að sjá hvað framtíðin bíður í skauti sér fyrir þessa fjölskyldu.
Innilega til hamingju með árangurinn Helga Hlín! Við erum afar stolt af þér!

Alma Hrönn Káradóttir keppir fyrir hönd Íslands á morgun 28.maí í Masters 35 í -76 kg flokki. Keppendur taka allir þátt á sínu heimasvæði útum allan heim og senda út upptökur sínar til Öldungasambandsins sem tekur saman árangurinn.

Frekari upplýsingar á https://www.iwfmasters.org/